BNO近月經常被議論紛紛，而身邊都多咗好多朋友同事討論移民，而英國樓盤既討論更為熱話，大多既想法都係買英國樓先，入得伙就起行移民。不過實在都係無可厚非既，尤其係喺宜家既社會氛圍同政治環境等等因素下。大家都會尋找不同既新機會，不同既出路，不同既新希望。但係出走，講就容易，走就真係唔係咁易。出走去住同出走去旅行真係好唔同。但係，無論邊樣都係需要做好功課，做好心理準備，做好期待管理。
（孕婦生產，公立私立醫院都要揀一輪啦，而且仲要汁走佬袋添。而走去住就更加啦。有d野真係急唔黎。生活指數，物價，校網，升值能力，全部都真係要逐一睇。）
買英國樓，買邊到好？
根據英國Halifax銀行最新報告顯示，綜合過去20年英國各地既樓價，升幅頭10位，有9個都係倫敦樓盤。而仲聯行更加預估，未來5年英國住宅價格整體將會上升14%，而倫敦物業更加係會跑贏嗰市，上升超過18%。所以，如果買英國樓，我覺得倫敦依然會係相對安全而又有升值能力既選擇。
打算移民定居既你，或者都係打算自住多，會覺得買賣、價錢呢D都同你關係唔大。但係如果有個一旦呢？2020既肺炎，難道仲唔足以證實聽日係真係無法預估咩？多手準備始終會好D。喺保值、升值能力大既地方買總比係其他地方保障多D，安全多D。
英國郊區樓盤，需求上升賣得過？
近日留意到網上有數據指出英國郊區樓盤變得搶手，價值能力，估價都上升咁。我自己就有所保留啦。我始終覺得2020係特別既一年。2020既數據都係特別既數據。最起碼，喺過去高速發展數幾廿年來，有幾何有過好似2020一樣全球既疫症流行啊？MERS，ZIKA，SARS，未至於全球性，亦未好似呢次既影響力大。2020既封鎖，閉關，停滯大概係前所未有既。所以，我覺得2020既數據係可供參考，但仲需要多D時間觀望既。始終買英國樓都係倫敦樓盤較保值。
港人對倫敦樓盤興趣上升
宏觀Google 過去5年數據，「英國樓盤」、「倫敦樓盤」既相關本地搜索都喺今年達到5年高位。正如前言，英國始終都係香港人熱門移民，留學，物業投資既國家。尤其係近來BNO有力誘因同埋社會因素等等影響下，對英國樓盤咁興趣既人大幅上升。亦有英國物業投資顧問喺訪問中指出，單一星期，港人就英國樓盤的查詢就達到200%增長。而當中好多都係關於生活方式相關既疑問，而不再單單係租金收入問題。可見，無論線上定線下，港人對買英國樓既熱衷都又明顯既上升。
面對龐大既興趣增長，樓盤，作為固定資產，並唔可能短時間大幅度增加供應彈性配合需求。根據需求定律，英國樓盤樓價既上升同買家議價能力既下降已經係可以預見既。相信當英國政府再進一步宣布BNO相關政策嗰陣，港人對英國樓盤既需求同興趣將會又一次被激發。
